طريقة تحضير بيني خفيف بالليمون
اليوم جبت ليكم بيني خفيف و هشيش بالليمون نتمنى يعجبكم
المقادير
كاس عصير ليمون
2 بيضات
1 فاني
1 خميرة
خميرة ديال العجينة
نص كاس سنيدة
نص كاس زيت
دقيق الي يجمع
زيت للقلي
سنيدة او سكر كلاصي للتزيين او حسب الرغبة
طريقة تحضير بيني خفيف بالليمون
كنخدمو البيض مع السنيدة غير بايدينا حتى يندامجو .. من بعد كنضيفو باقي المقادير و الدقيق شوية بشوية حتى تتجمع العجينة وندلكوها شوية بين ما تنساجم العناصر مع بعضياتها
غير العجينة قد ماكانت خفيفة قد ما كتجي هشيشة و زوينة
كنرشو طابلة أو رخامة أو ….. بشوية الدقيق و كنطلقو العجينة بالمطلق .. ماتكونش رقيقة بزاف
كنقطعو دوائر بالقطاعة ديال البيني او كاس بالحجم الي بغينا
الي كتبغيه مثقوب من الوسط حتى هو كيجي زوين
طريقة تحضير بيني خفيف بالليمون
كنغطيوه و نخليوه يخمر الوقت الكافي
كنسخنو الزيت وكنقسو العافية بزاااااف حيت كيطيب بسرعة و كنقليوه عادي
كاين الي كيدردر عليه مباشرة السنيدة .. أنا كنعملو فوق الورق النشاف باش يشرب الزيت لي فيه عاد كنرش عليه السنيدة أو السكر كلاصي
و بالصحة و الراحة
